Loading...
Close
23 მაისი 2018 09:25
მთავარიჩვენს შესახებსერვისებიკონტაქტი
მთავარი თემა
'ბიძინა ივანიშვილი ემხრობა ჰუმანურ ნარკოპოლიტიკას - ნარკოპოლიტიკასთან დაკავშირებით უმრავლესობაში პოზიციები დაახლოვდა'
დღის თემა
ადამიანის უფლებათა ევროპულ სასამართლოში საქმეზე 'საქართველო რუსეთის წინააღმდეგ' ზეპირი მოსმენა მიმდინარეობს
ეკონომიკა
მამუკა ბახტაძე - ჩვენი სტრატეგიის მთავარი პრიორიტეტია მცირე და საშუალო ბიზნესის წახალისება
ახალი ამბები »»»
ვიდეო
მიხეილ სააკაშვილი საქართველოს ხელისუფლებას - ხელები შორს საქართველოს ისტორიიდან!
ძიუდის ფედერაციის პრეზიდენტის სკამი, რომელიც ქუჩაში მოისროლეს, მოქალაქემ წაიღო
ლეგალიზება #მშვიდობისთვის - ბერა ივანიშვილის უახლესი სიმღერა აქციების ფონზე
პოლიტიკასაზოგადოებასამართალირეგიონიკულტურაკონფლიქტებიმსოფლიოანონსი
ინტერვიუ
ერეკლე დეისაძე - საბჭოთა მეთოდია - ეკლესია და სახელმწიფო ერთად აკონტროლებს მასას
გამოქვეყნების დრო – 16 ივნისი 2017 00:03


მუსიკოსი ერეკლე დეისაძე ბოლო პერიოდის გახმაურებული საქმის - რეპერების დაკავების ერთ-ერთი გამორჩეული ფიგურაა, რომელმაც საზოგადოებას მოუწოდა ქუჩაში გამოსვლისკენ. ერეკლე დეისაძე ქვეყანაში დანერგილ მავნე პრაქტიკაზე საუბრობს და აცხადებს, რომ ის თავის წილ პასუხისმგებლობას იღებს „ქართული ოცნების“ ხელისუფლებაში მოყვანისთვის. ერეკლე დეისაძე ერთ-ერთია მათ შორის, ვინც 2012 წელს ძალადობის წინააღმდეგ აქციაში - „სისტემა უნდა დაინგრეს“ მონაწილეობდა:


მუსიკოსი ერეკლე დეისაძე „ეურუსის“ შეკითხვებს პასუხობს:



- ყველაფერი თქვენი ემოციური სტატუსიდან დაიწყო, რაც რეპერების საქმეს უკავშირდებოდა და რომელიც სასამართლოდან გამოსულმა დაწერეთ. მას შემდეგ საზოგადეობის დიდმა ნაწილმა მოგვიანებით აგორებული საპროტესტო ტალღის მედროშედ მიგიჩნიათ. მაინც, რამ გაგაბრაზათ მაშინ, როდესაც ჯერ კიდევ ძიების პროცესი მიმდინარეობდა და დეტალები ცნობილი არ იყო?

- ბევრმა ფაქტორმა გამაბრაზა, გამოჩნდა სისტემა თავისი ცუდი მხარებით, ირგვლივ ყველაფერი გაშიშვლდა და გამჭვირვალე გახდა. ეს იყო ყოველგვარ ნორმას და ზღვარს გადასული ქმედება სახელმწიფოს მხრიდან. ამ შემთხვევაში ნარკოპოლიტიკა მეორე პლანზეა, მთავარი საკითხი ჩემთვის არის გამოხატვის თავისუფლება, რომელიც ყველა თავისუფალი ქვეყნის თავისუფალი მოქალაქის უმთავრესი ფუნდამენტური უფლებაა. ამ შემთხვევაში დავინახე ცენზურის ნიშნები, სადაც სახელმწიფო უხეშად ცდილობს ჩაერიოს ადამიანის ამ ფუნდამენტურ უფლებაში, ადამიანის გამოხატვის თავისუფლებაში და ეს არის ყოვლად დაუშვებელი. აქ საინტერესოა ის, თუ ვისი მითითებით მოხდა ამ ბიჭების დაკავება და ვინ დგას ამ ყველაფრის უკან. ფაქტია, მითითების გარეშე თავს უფლებას ვერ მისცემდა ვერცერთი პოლიციელი, მსგავსი რამ განეხორციელებია.

- გაქვთ ჩამოყალიბებული პოზიცია, ვინ შეიძლება იდგეს ამ საქმის უკან?

- მე მაქვს ეჭვი რომ ეს არის სახელმწიფო უწყება. ერთის მხრივ პრობლემაა ის რომ ყველაფერი თავის ნებაზეა მიშვებული. იმისთვის რომ მსგავსი ფაქტი არ განმეორდეს, სახელმწიფომ უნდა მოახდინოს შესაბამისი რეაგირება. იმისათვის რომ ქვეყანაში არ გაჩნდეს დაუსჯელობის სინდრომი, აუცილებელია დამნაშავეების დასჯა. პასუხი უნდა აგონ არამხოლოდ იმ პოლიციელებმა რომლებმაც ეს ჩაიდინეს, არამედ იმათ ვინც ეს მითითება გასცა.

- თქვენ ახსენეთ დანერგილი პრაქტიკა. ნარკოპოლიტიკასთან დაკავშირებით რა განსხვავებას ხედავთ არსებულ და წინა ხელისუფლებას შორის?

- ამ პრაქტიკაზე პასუხისმგებლობა თანაბრად ეკისრება ორივე ხელისუფლებას. ეს არის წინა ხელისუფლების მიერ დანერგილი პრაქტიკა, რომელსაც წარმატებით ახორციელებს დღევანდელი სისტემაც. დასაწყისში, როდესაც ხელისუფლება შეიცვალა, მქონდა ილუზია, რომ ეს იყო ინერცია, მაგრამ როდემდე შეიძლება გაგრძელდეს ინერცია? უკვე მეორე ვადით ავირჩიეთ და ეს ნიშნავს რომ უკვე არის დამკვიდრებული მეთოდი, რომელსაც ეს ხელისუფლებაც აქტიურად იყენებს იმ ადამიანების წინაღმდეგ, რომლებიც არ მოსწონს, გულზე არ ეხატება, არ ეთანხმება და ა.შ. ეს ძალიან საშიში სიგნალია, ამიტომ პასუხისმგებლობა ერთნაირად ეკისრება ორივე მხარეს.

ჩემს წილ პასუხისმგებლობას ვიღებ. როდესაც „ქართული ოცნება“ მოდიოდა მე ამაში ჩემი წვლილიც შევიტანე სტუდენტების გარეთ გამოყვანით, აქცია-კონცერტებით, რამაც იმ დროს თავისი წვლილი შეიტანა ამ პროცესში. ამიტომ, ეს ხელისუფლება ვალდებულია პასუხები გასცეს იმ კითხვებს, რაც ისმის არა რომელიმე პარტიის წარმომადგენლის მხრიდან არამედ უბრალოდ ქუჩიდან, უბრალო ადამიანებისგან, იმ თაობისგან რომელსაც აქვს ეს კითხვები და არც თუ უსაფუძვლო.

პოლიტიკური ძალები ცდილობენ ამ მოვლენების დისკრედიტაციას, ისინი დაბოღმილები არიან რომ ამდენი ხალხი თვითონ ვერ გამოყავთ. ისინი ნადირობენ ხმებზე, ჩვენ არაფერზე ვნადირობთ. ჩვენ გვინდა უკეთესი ქვეყანა გვქონდეს და ამ ქვეყანაში ყველა ადამიანის ფუნდამენტური უფლება იყოს დაცული.

- პირადად იცნობთ „ბირჟა მაფიის“ წევრებს და მათ მუსიკას/რეპს? თქვენი აზრით შეიცავდა ეს კლიპი ანტისახელმწიფოებრივ ნიშნებს?

- მე პირადად ვიცნობ ამ ბიჭებს, ბუნებრივია მათ შემოქმედებასაც. ის პროცესი რაც კულტურაში ვითარდება და ის რაც ამ სფეროში ხდება არის ძალიან კარგი. ვიდეორგოლის შინაარსი - ვის მოეწონა, ვის არ მოეწონა ეს კლიპი, სხვა თემაა. როდესაც კულტურაში მიმდინარე მოვლენა ესე აღიქმება, თავად ეს არის ანტისახელმწიფოებრივი ქმედება. როცა ვიცე პრემიერი აღნიშნულ ფაქტს უწოდებს ანტისახელმწიფოებრივს, თვითონ ეს განცხადებაა ანტისახელმწიფოებრივი! ეს არის ირიბი სიგნალი რომ თუ ვიღაცა მსგავს რაღაცას გაიმეორებს პოლიციას უფლებაა აქვს მის პირადში ჩაერიოს, ჩაუდოს ნარკოტიკი ან იარაღი, რაც აბსოლუტურად არასწორია და დაუშვებელია.

- საქართველოში, სასამართლო უფრო მნიშვნელოვანი თუ ბერა ივანიშვილის სტატუსები? თქვენც ფიქრობთ, რომ იქონია ბერა ივანიშვილის სტატუსმა გავლენა მოვლენების შემდგომ განვითარებაზე?

- საქართველოში ყველაზე მნიშვნელოვანია ადამიანი, მისი უფლებები და თავისუფლება. ეს სტატუსი უკვე აქციის შემდეგ დაიწერა და მე მასზე დიდ ყურადღებას არ ვამახვილებ. ჩემთვის უფრო მნიშვნელოვანი თავად ფაქტი და აქცია იყო. ჩემი აზრით იმ ათი ათასმა ადამიანმა იქონია გავლენა მოვლენების შემდგომ განვითარებაზე. იმ ათი ათასმა ადამიანმა იქონია გავლენა თვითონ ბერაზე. მისი სტატუსი არ არის დასაწყისი, ბერას სტატუსი არის ამ ყველაფრის ლოგიკური გაგრძელება. ჯერ იყო აქცია, მერე იყო ეს სტატუსი, მერე იყო პრემიერის გამოხმაურება, მერე კახი კალაძის გამოხმაურება. ყველაფრის სათავე ის ხალხია რომელიც იმ დღეს აქციაზე გამოვიდა.

- თქვენს სტატუსს დიდი აგრესია მოჰყვა, თამაზ მეჭიაურმა წუხილი გამოთქვა რომ ერეკლე მეორეზე მეტი მხარდამჭერი თქვენ გყავთ. მსგავს რეპლიკებზე როგორ რეაგირებთ?

- მსგავს სტატუსებს და გამოხმაურებებს მაინც პოზიტიურად აღვიქვამ, თუმცა ერთსაც ვიტყვი, თამაზ მეჭიაური არ არის ის პიროვნება რომელზეც შეიძლება რამე სერიოზული კომენტარი გავაკეთო.

- შარშან კანცელარიის შენობას პროექტორი მიანათეთ და პორნოგრაფიული კადრები გაუშვით, დღეს რას გაუშვებდით, რას მიანათებდით შესაძლებლობა რომ გქონდეთ?

- ჩემი პერფორმანსი ყოველთვის დამოკიდებულია იმ გარემოებაზე რომელიც იმ მომენტშია აქტუალური. მაშინ საჭირო იყო ამის გაშვება, მუდმივი ურთიერთბრალდებების რეჟიმი და კასრებში აღმოჩენილი კადრების ფრიალი მიუთითებდა იმაზე რომ სისტემამ აიღო უფლება პორნოზე, და სადაც მე ვარ იქ ამ უფლებას, ჩემს კუთვნილ უფლებას სისტემა ვერ წამართვემს. შესაბამისად, ეს იყო ჩემი სწორი რეაქცია, რომელსაც მოყვა ჩემი დაკავება რაც გარკვეულწილად იყო თავისუფლების შეზღუდვის და გამოხატვის თავისუფლებისთვის ხელის შეშლის მცდელობა, მაგრამ მაშინვე მოეგნენ გონს და არანაირი საგამომძიებლო მოქმედებები ამ თემის ირგვლივ არ დაწყებულა, შეწყვიტეს საქმის ძიება, ჩამორთმეული ნივთებიც დამიბრუნებს და საქმე დარჩა ისე, როგორც გვახსოვს.

- რა აკლია საქართველოს, ქართულ საზოგადოებას ყველაზე მეტად?

-
უამრავი რამ აკლია, პირველ რიგში აკლია თავისუფლება. მიუხედავად იმისა რომ თავისუფლება ყბადაღებულ სიტყვად იქცა და მუდმივ ეიფორიას იწვევს, მისი გააზრების პრობლემა მაინც არსებობს. თავისუფლება ესმით ისე რომ მარტო მათ აქვთ რაღაცის უფლება, ამ შემთხვევაში ხალხზე მაქვს საუბარი, და თუ სხვა განსხვავებულ აზრს იტყვის მზად არიან ჩაქოლონ, ქვები ესროლონ. ბევრად უფრო ლმობიერები უნდა ვიყოთ ერთმანეთის მიმართ. ვიყოთ კრიტიკულები სისტემის მიმართ, იმიტომ რომ სისტემა ყოველთვის ეცდება საზოგადეობის დაყოფას ფენებად, დაყოფას მათიანებად და სხვისიანებად, მაგრამ ამ ანკესს არ უნდა წამოვეგოთ. არავინ არის სხვა, ყველა არის ჩვენიანი, რომელიც შეიძლება სხვანაირად ფიქრობდეს და მას ამის უფლება აქვს და ვერ წავართმევთ. მე ვისურვებდი რომ ერთსულოვნები ვიყოთ დანაშაულებრივი სისტემის წინააღმდეგ საბრძოლველად. იყო აქცია, სადაც მე და გიორგი გაბედავა ერთად ვიდექით და მე ვერასოდეს წარმოვიდგენდი ამას, მაგრამ პრობლემამ გაგვაერთიანა. არსებობს საკითხები სადაც შეიძლება განსხვავებუილი ადამიანები გაერთიანდნენ ერთი პრობლემის ირგვლივ, ეს ჩვენ დავინახეთ ამ აქციაზე.

- რა საფრთხის შემცველია საზოგადოების გახლეჩვა, დაპირისპირებულ ბანაკებად დაყოფა?

- ეს იყო სხვათაშორის წინა ხელისუფლების ტერმინი, როდესაც ქვეყნის პირველი პირი, პრეზიდენტი გამოდიოდა და ახსენებდა ჩვენიანებს და სხვისიანებს. პრეზიდენტი თანაბრად ვალდებულია ყველასთან, ვინც აირჩია და ვინც არ აირჩია. წინასაარჩევნოდ ხელისუფლებებისგან ისმის დაპირებები „ჩვენ ხალხთან ერთად უნდა გავაკეთოთ ესა და ეს...“ საინტერესოა ვის ეძახიან ესენი ხალხს, მხოლოდ მათ მხარდამჭერებს? პრობლემაა ისაა რომ როცა ისინი ამბობენ „ხალხთან ერთად“, გულისხმობენ თავიანთ აქტივისტებს. ხალხი არ არის მხოლოდ მათი აქტივისტები, აქ არიან ადამიანები რომლებიც სხვანაირად ფიქრობენ. როცა სამ მილიონიანი ქვეყანა ხარ და მსგავსი ტერმინებით ცდილობ საზოგადეობაში ბზარი გააჩინო, დამნაშავე ხარ. იგივე პრეტენზია მაქვს ეკლესიის მიმართაც.

- კერძოდ, რა პრეტენზიები გაქვთ ეკლესიის მიმართ?

- ჩემი აზრით რელიგია და საპატრიარქო აბსოლუტურად სხვადასხვა რამეა და ამის განცალკევება აუცილებელია. საპატრიარქო და ეკლესია არის ინსტიტუცია, რომელსაც ჩემი აზრით უნდა ევალებოდეს განსხვავებულ საზოგადოებრივ ფენებს შორის ბალანსის დაცვა. მაგრამ იგი ხელისუფლების მსგავსად გვევლინება განყენებულ ორგანიზაციად, რომელიც მხოლოდ თავის წიაღში არსებულ ადამიანებს ანუ მრევლს აღიქვამს მოქალაქეებად, მის წიაღში არსებულის მიღმა მყოფ სუბიექტებს ქვეყნის მტრებს ეძახის და მიუქცევს ამ თავის მრევლს რომ ისინი ჩაქოლონ განსხვავებული შეხედულებების გამო, ეს არის დანაშაული. ეს არის იმ ინსტიტუციის მოშლა რომელიც გვესაუბრება ქრისტეს სახელით. მსგავსი ქმედებებით, ისინი თვითონვე სცხებენ ჩირქს საკუთარ თავსაც და ქრისტესაც. მემგონი, თვითონ მათგან არის დასაცავი რელიგია და არა დეისაძისგან და 17 მაისის აქციის მონაწილე ადამიანებისგან.

სასულიერო პირები მოწყვეტილი არიან ხალხს. ამის თქმის საფუძველს მაძლევს თუნდაც ის ფაქტი, რომ ჯიპებიდან არ გადმოდიან, ზემოდან იყურებიან. ეს არის ღარიბი ქვეყნის მდიდარი ეკლესია. ხალხი არის სიღარიბის ზღვარს მიღმა და ამის პარალელურად ჩვენ ვხედავთ მდიდარ მღვდლებს, მდიდრულ მანქანებს, რა მნიშვნელობა აქვს აჩუქა ვინმემ თუ ა.შ. არანაირი მნიშვნელობა არ აქვს, თვითონ ფორმაზე მაქვს საუბარი. ჩვენ სახარებიდან გვახსოვს რომ ქრისტემ ვაჭრები გაყარა ეკლესიიდან და ამათმა პირიქით, ეკლესიები აქციეს სავაჭრო დაწესებულებად. ქრისტეს გაყრილი ვაჭრები უკან დააბრუნეს. სამწუხაროდ ესეც საბჭოთა მეთოდია, როცა ურთიერთშეთანხმებულად ორი ინსტიტუცია ეკლესია და სახელმწიფო ერთად აკონტროლებს მასას.





ავტორი: თამარა საკანდელია

საინფორმაციო სააგენტო "ეურუსი" - Media agency Eurus.ge
ახალი ამბები
ინტერვიუ
ვიდეობლოგი
ანალიტიკა
განათლება
ხელოვნება
ჯანდაცვა/მედიცინა
მედია
ციტატები/ფრაზები
მეცნიერება
რელიგია
საინტერესო
ამინდი
ვალუტის კურსი
რა მოხდა დღეს
არქივი
პერსონა
ბლოგი
მოგზაურობა
ფლორა და ფაუნა
არქიტექტურა
გარემო
გასტრონომია
მოდა/სტილი
ფოტოამბავი
ჰოროსკოპი
ჩვენს შესახებ
სერვისები
კონტაქტი
საინფორმაციო სააგენტო "ეურუსი" - Media Agency Eurus.ge